*هفضل احبك......رغم تعب قلبي*

تنهيده منى ... و نفسها توصلك

و ميت قصيده كتبتها ؟؟ عنوانها اسمك

قولك ف عشقي مش هيفرق ف القضيه

هفضل احبك .. بس انا بدى اقولك





ف البعد عنك سكتى احزان ..

ضلمه و ضباب بينزفوا دخان

( ابيض و اسود ) دنيتى فى البعد

و لما اشوفك تعود لها الالوان




و الفجر يخرج من عيونك يبتسم

ضحكة نهار فوق الشفايف ... تترسم

و القى ف رموشك ألف قاضى و محكمه

يأسى و دموعى و خوفى فيها بيتعدم




رعشه ف ايديا و فوق شفايفى بتتولد

و كل كلمه ابعتها من قلبى للسانى

بتتفقد ..

لولا انى مؤمن و عارف الخلاق ...

كانت عيونك جوه منى هتتعبد




عجبى عليكى

عجبى عليكى ف بسمتك ألغاز

وف ضحكتك تاخدى لقب استاذ

بحلم بنفسى ف بدلتى و انتى ...

فستانك ابيض منور البرواز




يمكن تكون الصوره دى احلام

جايز حقيقه مخبياها ايام ...

مقدرش اقول يا حبيبتى غير إنى

من حبر روحى كتبتلك ... اجمل كلام